Navigationsmenüs (Musterschule)

Nachrichten

Zurück

07. März 2019

Plattdeutsch ist cool

28. Plattdüütsch Lääswettstriet 2019 – Un nu uk an de Marienschaule in Clop­penborg (04.03.2019)

Dor is weer wat los! Scheulers van Wangerooge bit hen nao ´n Dümmer un van der Weser bit hen an de Grenze van dat Emsland maokt weer mit bi ´n plattdüütschen Lääswettstriet, de aale twei Johre in Neddersassen stattfind´t, organiseert van de Ol­lenborger Landskup.

Ditmaol uk mit d´rbi 15 Scheulers van de Marienschaule in Clop­penborg. An ´n Maondag, 04. März was dat dann so wiet. Dor hebbt se wieset, wat se käönnt. Fliedig harn se sik vörbereitet unner dat Leit van Jürgen Müller un Heinz-Dieter Grein, de siet twei Johre nu all an de Marienschaule een Plattdüütsch-AG anbeiet. Dor wedd spält, sungen, läsen, plattdüütsch prooten of schnacken lernt. Un dit Johr hebbt se sik uk tautraut, bi´n Lääswettstriet mittaumaoken. De Scheulers ut de fieften, sess­ten un achten Klasse hebbt vör een Jury ehr Beste gäwen. Un dat hebbt se würkelk. De Jury is dat achternao wohrhaftig nich licht fallen. Denn Siegers wörn se aale, de dor aal ehrn Maut tauhoope naohmen hebbt un een Geschichte up Platt in ´n Wettstriet mit de annern vörläsen hebbt. Man an´n Enne, as aale Punkte, de tau vergäwen wörn tauhoopetellt wassen, köm dorbi ruut, dat för de Scheulers in de fieften un sessten Klasse Konstantin Sauerland up ´n ersten Platz köm. De tweide Platz güng an Chris­toph Thölke, de darde Platz an Lisa Voßmann.  In de Gruppe van de Scheulers ut de achten Klasse heff Konstantin Ahlers wunnen.

In de Jury seeten: Froo Simone Hegger-Flatken, Konrektorin an de Marienschaule i.k.T.; Frau Theresia Varnhorn, Schaulmestersche; Bernd Tabeling, Vörsitter van´n Heimatverein Cloppenborg: Heinz-Dieter Grein, Plattdüütsch-AG-Leiter; Heinrich Sie­fer, Warkkoppel för nedderdüütsche Spraak un Literatur bi de Ollenborger Landskup.

An´n Enne heff sik Heinrich Siefer van de Ollenborger Landskupp bi aale, de mitmao­ket hebbt heller bedanket. Denn dor hört all wat Maut tau, dat man sik mit een platt­düütschen Text för een Jury hensetten un den dann vörläsen deit, mennde Siefer. Vör allen fraide he sik doräöwwr, dat de Marienschaule ditmaol nao väle Johre weer bi den Lääswettstriet mitmaoket un dordör uk düüdelk maoken deit, dat Plattdüütsch in Schaule een Platz hebben kann. Dank dorför uk an de stellvertretende Schaulleiterin Simone Hegger-Flatken, de et sik nich nähmen löt, bi de Premiere van´n plattdüüt­schen Lääswettstriet mit d´rbitauwäsen. 

De Siegers un uk aale, de mitmaoket hebbt, kregen dann ut de Hand van Jürgen Müller een Urkunde un van Heinrich Siefer een plattdüütsch Billerbauk. Un as de Kinner fra­ogt wüdden, of se annermaol dor weer bi mitmaokent wullen, hebbt se forts aale tausäggt. Ehr har dat uk väl Pläseier maoket. Un dat gellt uk vör de Jury. De heff mit Pläseier de feinen Texte van de Scheulers taulustert un dat een of annermaol heller schmüüstern mösst.